Dentro do impresionante abanico de carreiras populares que se disputan todos os anos en Vigo, unha das que desenvolveu unha personalidade máis marcada é a Carreira Feminina-O Corte Inglés que o próximo 28 de xuño (a partir das 11:00 horas) vivirá a súa décima edición.
A proba, organizada pola Asociación Deportiva Media Maratón de Vigo, transcende o puramente deportivo porque a carreira non é competitiva e o que trata de facer é estender a súa práctica entre as mulleres, un sector da poboación que nos últimos anos cambiou a súa concepción do deporte, pero onde aínda quedan pasos que dar.
Fai dez anos duascentas mulleres tomaron parte na primeira edición da carreira. Desde entón a súa evolución foi evidente até chegar a preto dos 1.500 participantes hai un ano. Esta cifra é a referencia que toman os participantes coa idea de achegarse en pouco tempo ás 2.000 participantes. Onte a carreira foi presentada por Manel Fernández -concelleiro de Deportes do Concello de Vigo-, Rosa Fontaiña -da Asociación Rede de Mulleres Veciñais Contra vos Malos Tratos- e José Manuel Branco, xefe de relacións externas do Corte Inglés.
O prazo de inscrición, que xa se atopa aberto, durará até o 24 de xuño ás 20:00 e deberá formalizarse na planta de Deportes do Corte Inglés. O prezo desta inscrición é de 5 euros e con ela recibirase a camiseta conmemorativa desta edición e un vale desconto no centro comercial de 12 euros que se poderá utilizar na compra de material deportivo. Unha parte dos 5 euros da inscrición -como vén sendo habitual desde o nacemento da carreira- será destinada á Asociación Rede de Mulleres Veciñais Contra os Malos Tratos.
https://www.farodevigo.es/deportes/2015/06/10/mujeres-asaltan-calles-vigo-16890060.html